Hazrat Dr. Mir Muhammad Ismael (r.a)

In the following book, he explains his encounter with God in Masjid Mubarak, Qadian

Urdu – Audio Book

——————————-

His encounter with God in Masjid Mubarak, Qadian

خمخانہ عشق میں ایک رات: اللہ تعالیٰ کا حضرت میر محمد اسماعیل صاحب سے اپنی محبت کا اظہار

حضرت ڈاکٹرمیر محمد اسماعیل صاحب کے ایک کشف کی روئیداد

حضرت ڈاکٹرمیر محمد اسماعیل صاحب نے اپنے ایک مضمون بعنوان ’’ خمخانۂ عشق میں ایک رات ‘‘ میں اپنا ایک حیرت انگیز روحانی تجربہ بیان کیا ہے۔ یہ مضمون جو کہ الفضل قادیان مورخہ 3 نومبر 1936ء میں چھپاتھا، واقعی پڑھنے سے تعلق رکھتا ہے۔یہ واقعہ کشفی اور الہامی کیفیات کا مجموعہ ہے۔ ہم اسے مکالمۂ الٰہیہ بھی کہہ سکتے ہیں۔ دسمبر 1920ء کی بات ہے۔ حضرت میر صاحب کی عمر اس وقت 39برس تھی۔ ایک رات آپ مسجد مبارک قادیان میں عشاء کی نماز پڑھ کر فارغ ہوئے تو دیکھتے دیکھتے مسجد نمازیوں سے خالی ہوگئی اور آپ تنہا رہ گئے۔ حضرت میر صاحب بھی مسجد کی سیڑھیاں اُترنا شروع ہوئے کہ عشق الٰہی کی ایک عجیب کیفیت نے از خود آپ کے دل میں جوش مارا۔ گویا یہ کیفیت آپ کے دل پر نازل کی گئی۔ ساتھ ہی آپ کو مسجد کے اندر سے ایک غیبی آواز آئی کہ:’’ میرا گھر چھوڑ کر اپنے گھر چلا ہے ؟ اور پھر ایسے خلوت کے وقت میں جو آئندہ کبھی میسر نہیں آئے گا ؟ ‘‘ یہ آواز سن کر آپ اُلٹے پیر واپس مسجد کی سیڑھیاں چڑھنے لگے کہ اللہ تعالیٰ کی طرف سے پھر یہ حکم ہواکہ’’حریمِ قُدس کا رستہ بھول گیا ! یہ سیڑھیاں تو خمخانۂ عشق میں نہیں آتیں۔ نہ یہ عاشقوں کا راستہ ہے۔ ‘‘ پھر خدا تعالیٰ نے الہاماً فرمایا کہ :’’ آنا ہے تو پُرانی سیڑھیوں کی طرف سے آ۔ اور سر کے بل آ۔ اور گریبان چاک کر کے آ۔ ‘‘

چنانچہ اس الٰہی حکم کی تعمیل میں حضرت میر صاحب نے اُن قدیم اور تنگ سیڑھیوں کا رستہ اختیار کیا جو حضرت مسیح موعود علیہ السلام استعمال فرماتے تھے۔ چونکہ خداتعالیٰ کے سب سے بڑے عاشق اس زمانہ میں حضرت مسیح موعود علیہ السلام ہی تھے، اسی لئے وہ پُرانی سیڑھیاں ہی عاشقوں کا راستہ کہلائے جانے کے لائق تھیں۔ حضرت میر صاحب نے اس وقت ایک بے اختیاری کی حالت میں خود اپنے ہاتھوں سے اپنا گریبان چاک کیا۔ پرانی سیڑھیوں کی دہلیزپر پہنچے تو پھر حکم ہوا : ’’ اے اَشْعَث اَغْبَر لے اُٹھ اور اوپر چل۔‘‘ اَشْعَث اَغْبَر سے مراد بکھرے بال اور غبار آلودہ پیشانی والا شخص ہے۔ چنانچہ آپ نے پھر سیڑھیوں کو اِس طرح قدم بہ قدم طے کیا کہ ہر زینہ پر سجدہ کرتے اور پھر اپنی داڑھی سے اسے صاف کرتے اور پھر اگلے زینے کی طرف بڑھتے۔ آپ نے سیڑھیوں کا یہ مختصر سا رستہ زینہ بہ زینہ ایک گھنٹے میں طے کیا۔ مسجد میں پہنچ کر پھر آپ عبادت اور دعاؤں میں مشغول ہوگئے۔ اس راز و نیاز کے دوران حضرت میر صاحب نے اللہ تعالیٰ سے اُس کی بخشش طلب کی۔ اللہ تعالیٰ کی طرف سے جواب آیا کہ

’’ مفت ؟ ‘‘حضرت میر صاحب نے عرض کیا ’’ میں کیا پیش کر سکتا ہوں۔ جو کچھ ہے وہ آپ کا ہی دیا ہوا ہے۔‘‘اللہ تعالیٰ نے فرمایا۔

’’ جان اور ایک چیز سب سے عزیز‘‘

اِس حسین و دلنشین مکالمۂ الٰہیہ کے بعد حضرت میر صاحب کی تہجد جاری رہی۔ تہجد اور فجر کے درمیانی وقت میں جب کہ آپ محراب کے پیچھے پہلی صف میں بیٹھے تھے، کوئی دبے پاؤں خاموشی سے آپ کے پیچھے سے گزرا۔حضرت میر صاحب نے سر اُٹھا کر دیکھا تو بحالت بیداری آپ کو کشفاً اپنے سامنے ایک بہت بڑا آئینہ دکھائی دیا۔ تب آپ کو یہ احساس ہوا کہ جو ہستی آپ کے پیچھے تھی، وہ اِس آئینہ میں اپنا جلوہ آپ کو دکھانا چاہتی ہے۔ پھر اچانک آنکھ کو چندھیا دینے والا ایک نور اس آئینہ میں ظاہر ہوا جسے نظر بھر کر دیکھنا ناممکن تھا۔ لیکن حضرت میر صاحب نے پھر بھی ہمت کر کے اس آئینہ میں جلوہ گر خدا تعالیٰ کی تجلّی کو نظر بھر کر دیکھ ہی لیا۔ پھر اللہ تعالیٰ کی وہ نورانی تجلّی اسی طرح آہستہ آہستہ اُلٹے پاؤں پیچھے ہٹ گئی۔ حضرت میر صاحب کے اپنے الفاظ میں’’ یوں معلوم ہوتا تھا کہ اُس جانِ جاناں نے مجھے اپنا رخِ زیبا دکھانے کیلئے یہ شکل آفتابِ نصف النہار کی اختیار کی ہے اور میں نے اِس تمام ناز و انداز کے اندر ایک ارادہ، ایک مذاق، ایک شوخی، ایک ترحّم اور ایک محبت کی نظر کو بچشمِ خود ملاحظہ کیا۔‘‘حضرت میر محمد اسماعیل صاحب اللہ تعالیٰ کے ان بندوں میں سے تھے، جن کے بارے میں وہ خود فرماتا ہے کہ یُرِیْدُوْنَ وَجْھَہٗ یعنی وہ خداکا چہرہ دیکھنا چاہتے ہیں۔ دیدار کے اسی شوق نے آپ کو مجبور کیا کہ اس روحانی تجربہ کے دوران آگے بڑھ کر اور ہمت کر کے، اس نور کا نظر بھر کر مشاہدہ کریں کہ جس نور کی تاب آنکھیں نہیں رکھتیں۔صبح ہوتے ہی حضرت میر صاحب نے اللہ تعالیٰ سے اشارہ پا کر، پہلے ایک سیاہ بکرا اور ایک سفید مینڈھا قربان کئے۔ پھر اپنی عزیز ترین جائیداد یعنی آپ کا وہ ذاتی مکان جومسجد مبارک قادیان کے عین ساتھ تھا اور جس کا نام آپ نے ’’کنج عافیت‘‘ رکھا تھا وہ جماعت کو دے دیا۔ پھر جب گھر پہنچے تو اپنی عزیز بیٹی سیّدہ مریم صدیقہ پر نظر پڑی۔ آپ نے اُسی وقت اپنی بیٹی کو گود میں اُٹھا کر یہ دعا کی کہ ’’ اس کا نام ہی شاہد ہے۔ میرا پہلے بھی یہی ارادہ تھا۔ اب اسے بھی قبول فرمائیے۔ رَبَّنَا تَقَبَّلْ مِنًا إِنَّك أنْتَ السَّمِيعُ الْعَلِيْمُ‘‘اس حسین روحانی تجربہ پر جو کیفیت حضرت میر صاحب کے دل کی تھی، وہ آپ کے اپنے الفاظ میں پڑھنے کے لائق ہے۔ آپ تحریر فرماتے ہیں۔

’’زہے نصیب وہ اور مجھے اپنا چہرہ دکھائیں۔ وہ اور مجھ سے میری جان کا مطالبہ کریں۔ وہ اور مجھ سے ایک عزیز چیز کی نذر طلب فرمائیں۔‘‘ مسجد مبارک اور دارالمسیح کے قرب میں واقع آپ کی عزیز جائیداد ’’کنج عافیت‘‘وقف ہونے کے بعد اخبار الفضل کے دفتر کے طور پر استعمال ہوئی اور پھر بعد میں جماعت کے ہسپتال کے طور پر استعمال ہوتی رہی۔ گویا حضرت میر صاحب کا یہ نذرانہ اسی وقت قبول ہو گیا۔ اللہ تعالیٰ نے اس نذرانے کی قبولیت کا یوں ثبوت دیا، کہ ’’ کنج عافیت ‘‘سلسلۂ احمدیہ کے مختلف مقاصد کے لئے کام آتا رہا اور وقف رہا۔

حضرت میر محمد اسماعیل نے اپنی پہلی بیٹی کا نام ’’مریم صدیقہ‘‘ اِس نیت سے رکھا تھا کہ وہ حضرت مریم کی طرح اللہ تعالیٰ کی راہ میں وقف ہو، اور اسی بیٹی کا دوسرا نام آپ نے ’’ نذر الٰہی ‘‘ بھی اسی خیال سے رکھا تھا۔ یہ فکر حضرت میر صاحب کو بدستور لاحق رہی کہ ’’ مریم صدیقہ ‘‘کی صورت میں پیش کئے جانے والا نذرانہ قبول ہوا ہے یا نہیں۔ یہ فکر تقریباً 15 سال حضرت میر صاحب کو دامنگیر رہی۔ بالآخر خدا کی درگاہ میں اس نذرانے کی قبولیت کا نشان اس طرح ظاہر ہوا کہ آپ کی عزیز بیٹی سیّدہ مریم صدیقہ کا ہاتھ، آپ کی بڑی بہن حضرت (اماں جان )نے اپنے بیٹے حضرت مرزا بشیر الدین محمود احمد خلیفۃ المسیح الثانی کے لئے مانگ لیا۔ 1935ء میں سیّدہ مریم صدیقہ بنت حضرت میر محمد اسماعیل صاحب کی شادی حضرت مرزا محمود احمد ابن حضرت مسیح موعود علیہ السلام سے ہوئی۔ خلیفۃ المسیح کی بیگم کی حیثیت سے حضرت سیّدہ مریم صدیقہ (حضرت چھوٹی آپا) نے اپنا فرض خوب نبھایا اور اپنی زندگی خدمتِ دین اور تعلیمِ قرآن کیلئے وقف رکھی۔ صدر لجنہ اماء اللہ مرکزیہ کی حیثیت سے دنیا بھر کی احمدی عورتوں کی تربیت اور تنظیمی رہنمائی بھی کی اور یوں ’’ نذر الٰہی ‘‘ کے نام کی حقدار ٹھہریں۔رہا معاملہ ’’جان‘‘ کے نذرانہ کا، سو وہ بھی خوب انداز میں قبول ہوا۔ …